Viraventos comeza a súa andadura no ano 2007, de man dun grupo de persoas que deciden facer unha forte aposta para loitar a favor da integración do colectivo inmigrante en Galicia, e fundamentalmente dos menores de orixe inmigrante -das primeiras xeracións de galegos/as– , colectivo cada vez máis amplo, con grandes necesidades e carencias pero cunha oferta de servizos moi escasa, por ser un fenómeno moi recente Galicia.

Unha vez superadas as dificultades propias de calquera inicio, a organización foi dando forma ao seu proxecto nos primeiros anos de vida, encamiñando o noso traballo ó ámbito da educación, como instrumento básico de cambio social.

A partir do ano 2009, despois de dous anos como unha entidade exclusivamente de voluntariado, fixemos unha forte aposta pola profesionalización da entidade, como única vía para a consolidación e crecemento. Este feito significou un gran impulso para Viraventos, que pasa dende aquel momento a afrontar novos retos, incrementando considerablemente o volume de proxectos xestionados: no eido da Acción social, puxemos a disposición das persoas migrantes en situación ou risco de exclusión social, diferentes servizos de orientación, formación e asesoramento, centrando a maior parte dos nosos esforzos na implantación de programas específicos de apoio á maternidade e primeira infancia. No eido da Sensibilización e a Educación ao desenvolvemento, comezamos a traballar en campañas de loita contra a discriminación racial, mediante accións de educación intercultural dirixidas aos máis pequenos/as.

A crise económica que sacudiu Galicia nos seguintes anos, deixou en Galicia un panorama desolador, nos que tivemos que traballar máis duro que nunca, aumentando os colectivos de atención e os ámbitos de actuación, centrando a maior parte dos nosos esforzos na implantación de programas específicos de loita contra a pobreza infantil.

O ano 2015, foi un ano onde traballamos a reo para, sen abandoar os programas bandeira de Viraventos, poñer en marcha o proxecto Yarama África, unha tenda intercultural onde potenciar o valor da diversidade e das culturas africanas, e abrir un novo local onde prestar os nosos servizos con maior calidade.

Chegados a este punto da evolución da organización, en Viraventos tomamos conciencia da necesidade de xestionar un cambio cara un modelo organizacional máis complexo e eficiente, sen perder os aspectos positivos do traballo realizado ata aquel momento. Para iso, o equipo directivo participou ao longo de dous anos nunha intensa formación apoiada por servizos de consultoria, para  dar a nosa organización unha forma e estratexia máis clara, transparente e capaz de mellorar o impacto dos nosos proxectos.

No ano 2016, cando estabamos ás portas de cumprir os dez anos de existencia,  realizamos un intenso proceso de reflexión e planificación estratexica, no que xurdiron novos obxectivos e enfoques que nos guiarán ao longo dos próximos 4 anos.