Viraventos, en colaboración con Wayalia A Coruña, levou a cabo esta semana un taller presencial especializado centrado na mellora dos coidados ás persoas maiores mediante o uso de ferramentas baseadas en Intelixencia Artificial (IA). A iniciativa, dirixida a profesionais do sector sociosanitario, reuniu a 15 mulleres que exercen como coidadoras no ámbito domiciliario e asistencial.
O obxectivo principal da formación foi actualizar os métodos de traballo, ofrecer novos recursos tecnolóxicos e reforzar as habilidades clave que deben desenvolver as coidadoras no seu día a día. Durante a sesión, abordáronse temas como a organización de tarefas a través de aplicacións intelixentes, a detección temperá de cambios na saúde das persoas atendidas e o uso de asistentes virtuais como apoio na planificación e comunicación coas familias.
As participantes tiveron tamén a oportunidade de poñer en práctica diferentes ferramentas dixitais, así como de compartir experiencias e dúbidas co equipo formador. A actividade enmárcase nunha aposta conxunta de Viraventos e Wayalia por promover unha atención máis eficiente, humana e adaptada aos novos tempos, reforzando o papel das coidadoras como figuras profesionais fundamentais no coidado das persoas maiores.
Desde a organización destacaron “a excelente acollida do taller e o interese crecente por incorporar a IA como complemento ao traballo diario, sempre mantendo o enfoque humano e próximo que caracteriza o sector”.
A formación continuará con novas edicións e propostas orientadas á actualización continua do persoal coidador, un dos retos máis importantes no ámbito dos servizos asistenciais.
