Conócenos

Traballamos para garantir a igualdade e a convivencia entre persoas con diversas orixes nacionais ou culturais.  Facémolo desde a reivindicación, a proximidade e o afecto por todas as identidades.

Queremos promover unha conciencia crítica que cuestione as causas da pobreza e da desigualdade, as asimétricas relacións entre países e o actual funcionamento de gobernos e organismos internacionais.

O noso compromiso quere  contribuír á construción dun novo modelo social baseado na interculturalidade e a xustiza por medio tanto da intervención directa co colectivo inmigrante –os novos galegos e galegas- como da sensibilización sobre a importancia da diversidade, do respecto e o diálogo entre culturas como contribución á cohesión social.

Gostarianos ver consolidados nos próximos anos tanto os proxectos da nosa tenda solidaria (Yarama África) como os nosos servizos de apoio á plena participación socio-laboral e educativa de menores de orixe inmigrante e as súas familias. Agardamos que Viraventos e a súa sede social sexan coñecidos como espazo de convivencia entre colectivos e organizacións de inmigrantes e autóctonas para o que imos promover a comunicación e as relacións de familiaridade entre as poboacións de acollida e inmigrante mediante iniciativas interculturais e servizos de conciliación.

Os nosos proxectos queren ser tamén unha vía de participación e inclusión para persoas socialmente vulnerables.

Paralelamente, o proxecto da tenda Yarama África pretende dar visibilidade á diversidade cultural, facilitar o abastecemento e a identidade da poboación de orixe inmigrante e contribuír ao financiamento dos proxectos da organización.

• Viraventos pertence á Coordinadora Galega de ONGDs e ao Foro Galego da Inmigración
• Seleccionada no Programa Máis Social 2015 da Fundación Barrié
• Inscrita no Rexistro de Asociacións (Ministerio do Interior) co número 603859
• Inscrita no Rexistro Galego de Axentes de Cooperación para o Desenvolvemento Sección A nº A-190
• Inscrita no Rexistro Único de Entidades Prestadoras de Servizos Sociais da Xunta de Galicia co número RUEPSS E-2216
• Contamos coa colaboración habitual de 15 persoas voluntarias, estudantes en prácticas, e con máis de 5000 seguidores/as nas redes sociais